പ്രീമിയർ ലീഗിൽ ചെൽസിയെ ഏകപക്ഷീയമായ മൂന്ന് ഗോളിന് തോൽപ്പിച്ച് ബ്രൈറ്റൺ. ഗാമ്പിയൻ യുവ പ്രതിരോധ താരം യാക്കൂബ് മിൻ്റെ ഇരട്ട ഗോളുകളുമായി തിളങ്ങിയപ്പോൾ മൂന്നാം ഗോൾ മിറ്റോമ നേടി. ഒരാഴ്ച മുമ്പ് നടന്ന എഫ്.എ കപ്പ് നാലാം റൗണ്ട് മത്സരത്തിലും ബ്രൈറ്റൺ മരെസ്കയുടെ സംഘത്തെ പരാജയപ്പെടുത്തിയിരുന്നു.
27ാം മിനുട്ടിൽ ബോക്സിന് വെളിയിൽ നിന്നും ഗോൾ നേടി മിറ്റോമ ഗാലറിയെ ആവേശത്തിലാക്കി. ഗോൾകീപ്പർ വെർബ്രുഗ്ഗൻ നീട്ടി നൽകിയ പന്ത് പിടിച്ചെടുത്ത താരം ചെൽസി പ്രതിരോധനിരയെ കാഴ്ചക്കാരാക്കി ബ്രൈറ്റണ് ലീഡ് നൽകി. ചെൽസി പ്രതിരോധത്തിലെ കൂട്ട പൊരിച്ചിൽ മുതലെടുത്ത് വെൽബാക്ക് നൽകിയ പാസിനെ വലയിലാക്കി മിൻ്റെ ആദ്യപകുതിയിൽ ബ്രൈറ്റണിൻ്റെ ലീഡ് ഉയർത്തി.
മത്സരം 70 മിനിറ്റിനോട് അടുത്തപ്പോൾ മിൻ്റെ വീണ്ടും വലകുലുക്കി. വെൽബാക്കിൻ്റെ പാസിൽ ചെൽസി ഡിഫൻഡർമാരെ വകഞ്ഞ് മാറ്റിയ മിൻ്റെ സുന്ദരൻ ഫിനിഷിലൂടെ വലയിലാക്കി.
ചാമ്പ്യൻസ് ലീഗ് സ്പോട്ടിനു വേണ്ടി മത്സരിക്കുന്ന മാഞ്ചസ്റ്റർ സിറ്റി, ന്യൂകാസ്റ്റിൽ യുണൈറ്റഡ്, ബോൺമൗത്ത് ടീമുകൾക്ക് ചെൽസിയുടെ തോൽവി ആശ്വാസം പകരുന്നതാണ്. അടുത്ത മത്സരത്തിൽ വിജയിച്ചാൽ ഇവർക്ക് പട്ടികയിൽ ചെൽസിക്ക് മുകളിലേക്ക് കയറാം.
Discover more from
Subscribe to get the latest posts sent to your email.