മർമൗഷ് മാജിക്! ഫ്രാങ്ക്ഫർട്ട് ബയേണിനെ പിടിച്ചുകെട്ടി

ബുണ്ടസ്‌ലിഗയിൽ ബയേൺ മ്യൂണിക്കിനെ ഞെട്ടിച്ച് ഐൻട്രാക്ട് ഫ്രാങ്ക്ഫർട്ട്. രണ്ട് ഗോളുകളും ഒരു അസിസ്റ്റും നേടിയ മർമൗഷ് ഈ സീസണിൽ ഇതുവരെ എട്ട് ഗോളുകളും നാല് അസിസ്റ്റുകളും നേടിയിട്ടുണ്ട്.

ആവേശകരമായ മത്സരത്തിൽ ഇരു ടീമുകളും മൂന്ന് വീതം ഗോളുകൾ നേടി സമനിലയിൽ പിരിഞ്ഞു.

ഫ്രാങ്ക്ഫർട്ടിന്റെ ഈജിപ്ഷ്യൻ താരം ഒമർ മർമൗഷിന്റെ അസാമാന്യ പ്രകടനമാണ് മത്സരത്തിൽ നിർണായകമായത്.

15-ാം മിനിറ്റിൽ തോമസ് മുള്ളറുടെ പാസിൽ നിന്ന് ജോഷ്വാ കിമ്മിച്ച് ഗോൾ നേടി ബയേൺ മുന്നിലെത്തി. എന്നാൽ 22-ാം മിനിറ്റിൽ മർമൗഷ് ഗോൾ നേടി ഫ്രാങ്ക്ഫർട്ടിനെ സമനിലയിലെത്തിച്ചു.

35-ാം മിനിറ്റിൽ ഹ്യൂഗോ എകിറ്റിക്കെ ഫ്രാങ്ക്ഫർട്ടിനെ വീണ്ടും മുന്നിലെത്തിച്ചു. എന്നാൽ മൂന്ന് മിനിറ്റിനുള്ളിൽ കിങ്സ്‌ലി കോമൻ ഗോൾ നേടി ബയേണിനെ ഒപ്പമെത്തിച്ചു.

രണ്ടാം പകുതിയിൽ 53-ാം മിനിറ്റിൽ ഹാരി കെയ്‌നിന്റെ പാസിൽ നിന്ന് മൈക്കൽ ഒലീസ് ഗോൾ നേടി ബയേണിനെ വീണ്ടും മുന്നിലെത്തിച്ചു.

എന്നാൽ 94-ാം മിനിറ്റിൽ എറിക് ജൂനിയറിന്റെ പാസിൽ നിന്ന് മർമൗഷ് വീണ്ടും ഗോൾ കണ്ടെത്തി ഫ്രാങ്ക്ഫർട്ടിന് സമനില സമ്മാനിച്ചു.

ആറ് മത്സരങ്ങളിൽ നിന്ന് 14 പോയിൻ്റുമായി ബയേൺ പോയിൻ്റ് പട്ടികയിൽ ഒന്നാമതും അതേ പോയിൻ്റുമായി ആർബി ലൈപ്‌സിഗ് രണ്ടാമതുമാണ്. 13 പോയിൻ്റുമായി ഫ്രാങ്ക്ഫർട്ട് മൂന്നാം സ്ഥാനത്താണ്.