ഡേവിഡ് കാറ്റല പുറത്തേക്ക്? ബ്ലാസ്റ്റേഴ്സിൽ നിർണായക നീക്കങ്ങൾ
സീസണിലെ തുടർച്ചയായ പരാജയങ്ങൾ ആരാധകർക്കിടയിൽ വലിയ പ്രതിഷേധത്തിന് കാരണമായ സാഹചര്യത്തിലാണ് ക്ലബ്ബ് മാനേജ്മെന്റ് കടുത്ത തീരുമാനത്തിലേക്ക് നീങ്ങുന്നത്.
ഇന്ത്യൻ സൂപ്പർ ലീഗിലെ മോശം പ്രകടനത്തെത്തുടർന്ന് കേരള ബ്ലാസ്റ്റേഴ്സ് പരിശീലകൻ ഡേവിഡ് കാറ്റലയുടെ സ്ഥാനം തെറിക്കുമെന്ന് സൂചന (Kerala Blasters David Catala Sacking News).
സീസണിലെ തുടർച്ചയായ പരാജയങ്ങൾ ആരാധകർക്കിടയിൽ വലിയ പ്രതിഷേധത്തിന് കാരണമായ സാഹചര്യത്തിലാണ് ക്ലബ്ബ് മാനേജ്മെന്റ് കടുത്ത തീരുമാനത്തിലേക്ക് നീങ്ങുന്നത്.
പ്രമുഖ കായിക മാധ്യമപ്രവർത്തകനായ മാർക്കസ് മെർഗുല്ലോയാണ് കാറ്റലയുടെ പുറത്തുപോക്ക് സംബന്ധിച്ച നിർണ്ണായക വിവരങ്ങൾ പുറത്തുവിട്ടിരിക്കുന്നത്. അടുത്ത 48 മണിക്കൂറിനുള്ളിൽ പരിശീലകന്റെ കാര്യത്തിൽ ഔദ്യോഗിക തീരുമാനം ഉണ്ടായേക്കുമെന്നാണ് റിപ്പോർട്ട്.
ഈ സീസണിൽ ഇതുവരെ കളിച്ച ആറ് മത്സരങ്ങളിലും ബ്ലാസ്റ്റേഴ്സിന് വിജയവഴിയിൽ എത്താൻ സാധിച്ചിട്ടില്ല. അഞ്ച് തോൽവികളും ഒരു സമനിലയുമായി വെറും ഒരു പോയിന്റ് മാത്രമാണ് ടീമിന്റെ സമ്പാദ്യം.
ഐഎസ്എൽ പോയിന്റ് പട്ടികയിൽ പതിമൂന്നാം സ്ഥാനത്താണ് നിലവിൽ ബ്ലാസ്റ്റേഴ്സ്. വലിയ പ്രതീക്ഷകളോടെ എത്തിയ കാറ്റലയ്ക്ക് ടീമിനെ വിജയത്തിലേക്ക് നയിക്കാൻ കഴിയാത്തത് മാനേജ്മെന്റിനെ ചൊടിപ്പിച്ചിട്ടുണ്ട്.
ഈസ്റ്റ് ബംഗാളിനെതിരെ നേടിയ ഏക സമനില മാത്രമാണ് സീസണിൽ ബ്ലാസ്റ്റേഴ്സിന് ആശ്വസിക്കാൻ വകനൽകുന്ന ഏക കാര്യം.
കഴിഞ്ഞ ദിവസം പഞ്ചാബ് എഫ്സിക്കെതിരെ സ്വന്തം തട്ടകമായ കൊച്ചിയിൽ നടന്ന മത്സരത്തിലും ബ്ലാസ്റ്റേഴ്സ് പരാജയപ്പെട്ടിരുന്നു. ആരാധകർ ഏറെ പ്രതീക്ഷയോടെ കാത്തിരുന്ന മത്സരത്തിൽ നേരിട്ട ഈ തോൽവി കാറ്റലയുടെ പരിശീലക സ്ഥാനത്തിന് വലിയ തിരിച്ചടിയായി.
ALSO READ: ബ്ലാസ്റ്റേഴ്സ് നേടിയത് രണ്ട് ഗോളുകൾ; രണ്ടിന് പിന്നിലും ഒരു മലയാളി
മത്സരത്തിന് ശേഷം നടന്ന ഔദ്യോഗിക വാർത്താ സമ്മേളനത്തിൽ ഡേവിഡ് കാറ്റല പങ്കെടുക്കാതിരുന്നത് അഭ്യൂഹങ്ങൾക്ക് കൂടുതൽ കരുത്തുപകർന്നു. മുഖ്യ പരിശീലകന് പകരം സഹപരിശീലകനാണ് മാധ്യമങ്ങളെ കണ്ടത്.
ഐഎസ്എല്ലിലെ ഏറ്റവും വലിയ ആരാധകക്കൂട്ടമായ ‘മഞ്ഞപ്പട’ സോഷ്യൽ മീഡിയയിലടക്കം പരിശീലകനെതിരെ വലിയ രീതിയിലുള്ള പ്രതിഷേധം ഉയർത്തുന്നുണ്ട്. ടീമിന്റെ തന്ത്രങ്ങളിൽ മാറ്റം വരുത്താൻ കാറ്റലയ്ക്ക് സാധിക്കുന്നില്ലെന്നും യുവതാരങ്ങളെ വേണ്ടവിധം ഉപയോഗിക്കുന്നില്ലെന്നുമാണ് പ്രധാന വിമർശനം.
മുന്നേറ്റ നിരയിലെ പാകപ്പിഴകളും പ്രതിരോധത്തിലെ വിള്ളലുകളും പരിഹരിക്കാൻ കാറ്റലയ്ക്ക് കഴിയാതെ പോയതാണ് ടീമിന്റെ തകർച്ചയ്ക്ക് പ്രധാന കാരണം.
വരാനിരിക്കുന്ന മത്സരങ്ങളിൽ ടീമിന് തിരിച്ചുവരണമെങ്കിൽ പുതിയൊരു തന്ത്രജ്ഞൻ വേണമെന്ന നിലപാടിലാണ് ക്ലബ്ബ് അധികൃതർ എന്നാണ് സൂചന.
ടീമിന്റെ സഹപരിശീലകന് താല്ക്കാലിക ചുമതല നൽകാനോ അതോ പുതിയൊരു വിദേശ പരിശീലകനെ ഉടൻ നിയമിക്കാനോ ഉള്ള സാധ്യതകളാണ് നിലവിൽ ക്ലബ്ബ് ആരായുന്നത്.
കൊമ്പന്മാരുടെ ഈ പ്രതിസന്ധി ഘട്ടം എങ്ങനെ മറികടക്കുമെന്നാണ് ഇപ്പോൾ ആരാധകർ ഉറ്റുനോക്കുന്നത്.
ALSO READ: അടുത്ത സീസണിലെ പരിശീലകനാര്? റയലിന്റെ പട്ടികയിൽ 6 സൂപ്പർ പരിശീലകർ…
content: Kerala Blasters David Catala Sacking News
Discover more from
Subscribe to get the latest posts sent to your email.