അടുത്ത സീസണിലെ പരിശീലകനാര്? റയലിന്റെ പട്ടികയിൽ 6 സൂപ്പർ പരിശീലകർ…

റിയൽ മാഡ്രിഡിന്റെ പരിശീലക കസേരയിൽ അടുത്ത സീസണിൽ ആര് ഇരിക്കുമെന്ന ചർച്ചകൾ ശക്തമാണ്(Real Madrid coach next season). നിലവിൽ താത്കാലിക പരിശീലകന് കീഴിലാണ് ടീം, എങ്കിലും അടുത്ത സീസണിലേക്ക് പുതിയ പരിശീലകനെ അവർക്ക് കണ്ടെത്തേണ്ടതുണ്ട്.

ആറ് പ്രമുഖരുടെ പേരുകളാണ് ഇപ്പോൾ റിയലിന്റെ സാധ്യതാ പട്ടികയിൽ മുൻപന്തിയിലുള്ളത്.

അന്താരാഷ്ട്ര കായിക മാധ്യമങ്ങൾ പുറത്തുവിടുന്ന റിപ്പോർട്ടുകൾ പ്രകാരം ജർമ്മൻ ഇതിഹാസം യൂർഗൻ ക്ലോപ്പ് മുതൽ യുവ പരിശീലകൻ സെസ്ക് ഫാബ്രിഗാസ് വരെ ഈ പട്ടികയിൽ ഇടംപിടിച്ചിട്ടുണ്ട്.

ALSO READ: ‘ ഫൈനലിസ്മ’ നടക്കും; നിർണായക തീരുമാനവുമായി യുവേഫയും കോൺമെബോളും; അപ്‌ഡേറ്റ് ഇതാ

1. ക്ളോപ്പ്

ഈ പട്ടികയിൽ ആരാധകർ ഏറ്റവും ആവേശത്തോടെ നോക്കിക്കാണുന്ന പേര് യൂർഗൻ ക്ലോപ്പിന്റേതാണ്. ലിവർപൂളിനെ പ്രീമിയർ ലീഗിന്റെയും ചാമ്പ്യൻസ് ലീഗിന്റെയും നെറുകയിൽ എത്തിച്ച ക്ലോപ്പ് നിലവിൽ പരിശീലന രംഗത്തുനിന്ന് മാറി വിശ്രമത്തിലാണ്. എങ്കിലും റിയൽ മാഡ്രിഡ് പോലൊരു വമ്പൻ ക്ലബ്ബ് ഓഫറുമായി സമീപിച്ചാൽ അദ്ദേഹം അത് നിരസിക്കാൻ സാധ്യതയില്ലെന്നാണ് വിലയിരുത്തപ്പെടുന്നത്. റിയലിനെ പരിശീലിപ്പിക്കാനുള്ള തന്റെ താൽപ്പര്യത്തെക്കുറിച്ച് ക്ലോപ്പ് നേരത്തെ തന്നെ സൂചനകൾ നൽകിയിട്ടുണ്ട്. നിലവിൽ റെഡ്ബുള്ളിന്റെ ഗ്ലോബൽ സോക്കർ ഹെഡ് ആയി പ്രവർത്തിക്കുന്ന അദ്ദേഹത്തിന്റെ ‘ഹെവി മെറ്റൽ ഫുട്ബോൾ’ ശൈലി മാഡ്രിഡിന്റെ ആവേശകരമായ ഫുട്ബോളിന് മാറ്റുകൂട്ടുുമെന്ന് ആരാധകർ വിശ്വസിക്കുന്നു.

2. ഉനായ് എമറി

മറ്റൊരു പ്രധാനി നിലവിൽ പ്രീമിയർ ലീഗ് ക്ലബ്ബായ ആസ്റ്റൺ വില്ലയുടെ പരിശീലകൻ ഉനായ് എമറിയാണ്. തരംതാഴ്ത്തൽ ഭീഷണി നേരിട്ടിരുന്ന വില്ലയെ പ്രീമിയർ ലീഗിലെ ആദ്യ നാല് സ്ഥാനങ്ങളിലേക്ക് എത്തിച്ച എമറിയുടെ മികവ് റിയൽ മാഡ്രിഡ് മാനേജ്‌മെന്റിനെ വലിയ രീതിയിൽ ആകർഷിച്ചിട്ടുണ്ട്. സ്പാനിഷ് ലീഗിൽ (ലാ ലിഗ) നേരത്തെ തന്നെ പരിശീലകനായി മികച്ച പരിചയസമ്പത്തുള്ള എമറിക്ക് റിയൽ മാഡ്രിഡിന്റെ സാഹചര്യം പെട്ടെന്ന് ഉൾക്കൊള്ളാൻ സാധിക്കുമെന്നത് അനുകൂല ഘടകമാണ്. തന്ത്രപരമായ നീക്കങ്ങൾ നടത്തുന്നതിൽ എമറിക്കുള്ള വൈദഗ്ധ്യം ക്ലബ്ബിന് ഗുണകരമാകും.

3. ഫാബ്രിഗാസ്

യുവ പരിശീലകരുടെ നിരയിൽ നിന്ന് സെസ്ക് ഫാബ്രിഗാസിന്റെ പേരും സജീവമായി ഉയരുന്നുണ്ട്. ഇറ്റാലിയൻ ക്ലബ്ബായ കോമോ 1907-നെ പരിശീലിപ്പിക്കുന്ന ഫാബ്രിഗാസിന് കീഴിൽ ആ ടീം മികച്ച പ്രകടനമാണ് കാഴ്ചവെക്കുന്നത്. ഇറ്റാലിയൻ ലീഗായ സീരി എയിൽ നാലാം സ്ഥാനത്തുള്ള കോമോ, കോപ്പ ഇറ്റാലിയയിൽ സെമി പ്രവേശനവും നേടിയിട്ടുണ്ട്. ഇതോടെ ഫാബ്രിഗാസിന്റെ പരിശീലക മികവ് ഫുട്ബോൾ ലോകം അംഗീകരിച്ചു കഴിഞ്ഞു. ഒരു കളിക്കാരൻ എന്ന നിലയിൽ സ്പാനിഷ് ഫുട്ബോളിന്റെ നാഡിമിടിപ്പ് അറിയാവുന്ന ഫാബ്രിഗാസ് റിയലിലേക്ക് വരുന്നത് വലിയ മാറ്റങ്ങൾക്ക് കാരണമായേക്കാം.

4. പോച്ചെട്ടിനോ

അനുഭവസമ്പന്നനായ മൗറീഷ്യോ പോച്ചെട്ടിനോയാണ് പട്ടികയിലെ മറ്റൊരു താരം. ടോട്ടൻഹാമിനെയും പിഎസ്ജിയേയും പരിശീലിപ്പിച്ച അദ്ദേഹം ആക്രമണാത്മക ഫുട്ബോളിന്റെ വക്താവാണ്.

സ്പാനിഷ് ശൈലിയുമായി ഇണങ്ങിച്ചേരാൻ അദ്ദേഹത്തിന് എളുപ്പത്തിൽ സാധിക്കുമെന്നത് സാധ്യതകൾ വർദ്ധിപ്പിക്കുന്നു.

5. അർബെലോവ

ക്ലബ്ബിന്റെ താത്കാലിക പരിശീലകനായി നിലവിൽ പ്രവർത്തിക്കുന്ന അൽവാരോ അർബെലോവയെ അടുത്ത സീസണിലും നിലനിർത്തണമെന്ന അഭിപ്രായവും ശക്തമാണ്.

ടീം നിലവിൽ മികച്ച ഫോമിലല്ലെങ്കിലും ക്ലബ്ബിന്റെ പാരമ്പര്യവും ഡിഎൻഎയും കൃത്യമായി അറിയാവുന്ന അർബെലോവയ്ക്ക് കൂടുതൽ സമയം നൽകണമെന്നാണ് ക്ലബ്ബിനുള്ളിലെ ഒരു വിഭാഗം വാദിക്കുന്നത്.

6. അല്ലെഗ്രി

ഇറ്റാലിയൻ കരുത്തനായ മാസിമിലിയാനോ അല്ലെഗ്രിയാണ് പട്ടികയിലെ ആറാമൻ. യുവന്റസിനൊപ്പം നിരവധി കിരീടങ്ങൾ നേടിയ അനുഭവസമ്പത്ത് അദ്ദേഹത്തിന് അവകാശപ്പെടാനുണ്ട്.

എങ്കിലും അദ്ദേഹത്തിന്റെ കടുത്ത പ്രതിരോധ ശൈലിയോട് പല ഫുട്ബോൾ വിദഗ്ധർക്കും വിയോജിപ്പുണ്ട്. ആക്രമണ ഫുട്ബോളിനെ സ്നേഹിക്കുന്ന റിയൽ മാഡ്രിഡ് ആരാധകർക്ക് അല്ലെഗ്രിയുടെ ശൈലി എത്രത്തോളം സ്വീകാര്യമാകുമെന്നത് വലിയൊരു ചോദ്യചിഹ്നമാണ്.

 

content: Real Madrid coach next season