ജയം കണ്ടെത്താനാകാതെ മലപ്പുറം എഫ്.സി

തുടർച്ചയായ നാലാം മത്സരത്തിലും വിജയം കണ്ടെത്താനാകാതെ മലപ്പുറം എഫ്.സി. തിരുവനന്തപുരം കൊമ്പൻസുമായുള്ള മത്സരത്തിൽ ഇരു ടീമും ഓരോ ഗോൾ വീതം നേടി സമനില പാലിച്ചു.

ക്യാപ്റ്റൻ അനസ് എടത്തോടികയുടെ അഭാവത്തിൽ വിദേശ താരം ഐറ്റർ അൾഡാളറാണ് മലപ്പുറം എഫ്.സിയെ നയിച്ചത്. ആദ്യ പകുതിയുടെ 33 ആം മിനിറ്റിൽ സ്പാനിഷ് താരം അലക്സ് സാഞ്ചസ്സിലൂടെ മലപ്പുറമാണ് മുന്നിലെത്തുന്നത്. കൊമ്പൻസിന്റെ പ്രതിരോധനിരയിക്കിടയിലൂടെ വന്ന പന്തിനെ കൃത്യമായ ഫിനിഷിലൂടെ വലയിലെത്തിച്ച സാഞ്ചസ് മലപ്പുറത്തിനായുള്ള തൻ്റെ ആദ്യ ഗോൾ നേടി. ഗോൾ മടക്കുവാനുള്ള കൊമ്പൻസിന്റെ ശ്രമം 87 ആം മിനിറ്റിൽ ഫലം കണ്ടു. പകരക്കാരനായി ഇറങ്ങിയ വൈഷ്ണവ് സുന്ദരമായ ഫിനിഷിലൂടെ കൊമ്പൻസിന് ഒരു പോയിൻ്റ് നേടിക്കൊടുത്തു.

അഞ്ചു മത്സരങ്ങളിൽ നിന്നും കേവലം അഞ്ചു പോയിൻ്റ് മാത്രമുള്ള മലപ്പുറത്തിന് ഇനിയുള്ള മത്സരങ്ങൾ നിർണായകമാണ്. ഒക്ടോബർ 9ന് ഫോർസ കൊച്ചിയുമായാണ് മലപ്പുറത്തിൻ്റെ അടുത്ത മത്സരം.