ഡച്ച് ഫുട്‌ബോള്‍ ഇതിഹാസ താരം ക്ലാരന്‍സ് സീഡോര്‍ഫ് ഇസ്ലാം മതം സ്വീകരിച്ചു.
എസി മിലാന്‍, റയല്‍ മാഡ്രിഡ്, അജാക്സ് ആംസ്റ്റര്‍ഡാം എന്നീ ക്ലബുകളുടെ ഏറ്റവും മികച്ച കളിക്കാരിലൊരാളായിരുന്ന താരം തന്റെ ഔദ്യോഗിക ഇന്‍സ്റ്റാഗ്രാം പേജിലൂടെയാണ് ഇക്കാര്യം അറിയിച്ചത്.
അദ്ദേഹത്തിന്റെ ഇന്‍സ്റ്റാഗ്രാം പോസ്റ്റില്‍ അദ്ദേഹം എഴുതി.
“ഞാന്‍ മുസ്ലീം കുടുംബത്തില്‍ ചേര്‍ന്നത് ആഘോഷിച്ചു കൊണ്ടുള്ള എല്ലാ നല്ല സന്ദേശങ്ങള്‍ക്കും പ്രത്യേക നന്ദി. ലോകമെമ്പാടുമുള്ള എന്റെ സഹോദരീസഹോദരന്മാരുമായി ചേരുന്നതില്‍ എനിക്ക് അതിയായ സന്തോഷമുണ്ട്, പ്രത്യേകിച്ച് ഇസ്ലാമിന്റെ അര്‍ത്ഥം എന്നെ കൂടുതല്‍ ആഴത്തില്‍ പഠിപ്പിച്ച എന്റെ പ്രിയപ്പെട്ട സോഫിയ. ഞാന്‍ എന്റെ പേര് മാറ്റിയിട്ടില്ല, എന്റെ മാതാപിതാക്കള്‍ ക്ലാരന്‍സ് സീഡോര്‍ഫ് എന്ന് നല്‍കിയ എന്റെ പേര് അതി പോലെ തുടരും. ലോകത്തിലെ എല്ലാവര്‍ക്കും ഞാന്‍ എന്റെ എല്ലാ സ്‌നേഹവും അയയ്ക്കുന്നു.”
യുവേഫ ചാമ്പ്യന്‍സ് ലീഗ് ചരിത്രത്തില്‍ മൂന്ന് വ്യത്യസ്ത ക്ലബ്ബുകള്‍ക്കൊപ്പം ചാമ്പ്യന്‍സ് ലീഗ് നേടിയ ഏക കളിക്കാരനാണ് സീഡോര്‍ഫ്.
ചാമ്പ്യന്‍സ് ലീഗ് ചരിത്രത്തിലെ ഏറ്റവും വിജയികളായ കളിക്കാരില്‍ ഒരാളായി സീഡോര്‍ഫ് കണക്കാക്കപ്പെടുന്നു. 1995-ല്‍ അജാക്‌സിനൊപ്പവും, 1998-ല്‍ റയല്‍ മാഡ്രിഡിനൊപ്പവും, 2003-ലും 2007-ലും എ.സി.മിലാനൊപ്പവും അദ്ദേഹം ചാമ്പ്യന്‍സ് ലീഗ് കിരീടമുയര്‍ത്തി.
ഫുട്‌ബോളിലെ ഇതിഹാസ തലമുറയില്‍ നിന്നുള്ള താരം, ഡച്ച് ദേശീയ ടീമിനെ 87 തവണ പ്രതിനിധീകരിച്ചു, കൂടാതെ മൂന്ന് യുവേഫ യൂറോപ്യന്‍ ഫുട്‌ബോള്‍ ചാമ്പ്യന്‍ഷിപ്പുകളിലും (1996, 2000, 2004), 1998 ഫിഫ ലോകകപ്പിലും കളിച്ചു.
1976-ല്‍ റിപ്പബ്ലിക് ഓഫ് സുരിനാമില്‍ ജനിച്ച മിഡ്ഫീല്‍ഡര്‍ക്ക് എസി മിലാനുമായി ദീര്‍ഘകാല ബന്ധം ഉണ്ടായിരുന്നു, അവിടെ ഫ്രാങ്കോ ബറേസി, പൗലോ മാല്‍ഡിനി, മാര്‍ക്കോ വാന്‍ ബാസ്റ്റന്‍, റൂഡ് ഗുള്ളിറ്റ്, ഫ്രാങ്ക് റിക്കാര്‍ഡ് എന്നിവരോടൊപ്പം ക്ലബ്ബിന്റെ ഏറ്റവും മികച്ച ഇതിഹാസങ്ങളില്‍ ഒരാളായി.
അദ്ദേഹത്തിന്റെ ഭാര്യ സോഫിയ ഇന്‍സ്റ്റാഗ്രാമില്‍ കുറിച്ചു: ”മുസ്ലീം കുടുംബത്തില്‍ ചേരുന്ന എന്റെ പ്രിയതമന്റെ സവിശേഷവും മനോഹരവുമായ ഈ നിമിഷത്തിന്റെ ഭാഗമാകാന്‍ കഴിഞ്ഞതില്‍ എനിക്ക് അതിയായ സന്തോഷവും അഭിമാനവുമുണ്ട്. സ്വാഗതം, നിങ്ങള്‍ തുടര്‍ന്നും അനുഗ്രഹിക്കപ്പെടുകയും ലോകത്തെ പ്രചോദിപ്പിക്കുകയും ചെയ്യട്ടെ. ഒരുപാട് സ്‌നേഹം.”
സോഷ്യല്‍ മീഡിയയില്‍ താരത്തിന് പ്രമുഖ ഫുട്ബാള്‍ താരങ്ങളടക്കം നിരവധി പേര് സ്‌നേഹാഭിവാദ്യങ്ങള്‍ നേര്‍ന്നു.
Discover more from
Subscribe to get the latest posts sent to your email.