സ്റ്റാറും സോണിയുമല്ല; ഇന്ത്യയിൽ ലോകകപ്പ് സംപ്രേക്ഷണം ചെയ്യുക പുതിയ ചാനൽ വഴി

ആഴ്ചകളോളം നീണ്ടുനിന്ന കടുത്ത അനിശ്ചിതത്വങ്ങൾക്കും ആശങ്കകൾക്കും ഒടുവിൽ ഇന്ത്യൻ ഫുട്‌ബോൾ പ്രേമികൾക്ക് ആശ്വസിക്കാൻ വക നൽകിക്കൊണ്ട് പുതിയ പ്രഖ്യാപനം വരുന്നു. വരാനിരിക്കുന്ന 2026 ഫിഫ ലോകകപ്പ് മത്സരങ്ങൾ ഇന്ത്യയിൽ തത്സമയം സംപ്രേക്ഷണം ചെയ്യും (FIFA World Cup 2026 Broadcast India). ഇതിനായുള്ള നിർണായക ചർച്ചകൾ പൂർത്തിയായതായാണ് ഡൽഹിയിൽ നിന്നുള്ള ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്. അടുത്ത ആഴ്ച ആദ്യം തന്നെ ഇത് സംബന്ധിച്ച ഔദ്യോഗിക പ്രഖ്യാപനം ഉണ്ടാകുമെന്നാണ് പ്രതീക്ഷിക്കുന്നത്.

 

അഖിലേന്ത്യാ ഫുട്‌ബോൾ ഫെഡറേഷൻ മുൻ ജനറൽ സെക്രട്ടറി ഷാജി പ്രഭാകരൻ ഈ വിഷയത്തിൽ അനുകൂലമായ സൂചനകൾ നൽകിയിട്ടുണ്ട്. ലോകകപ്പ് സംപ്രേക്ഷണവുമായി ബന്ധപ്പെട്ട അണിയറ നീക്കങ്ങൾ പൂർത്തിയായതായും ആരാധകരുടെ കാത്തിരിപ്പ് ഉടൻ അവസാനിക്കുമെന്നും അദ്ദേഹം വ്യക്തമാക്കി. മുൻനിര ചാനലുകൾ പിൻവാങ്ങിയതോടെ ഇന്ത്യയിൽ ഇത്തവണ ലോകകപ്പ് കാണാൻ കഴിയില്ലേ എന്ന ഭീതിയിലായിരുന്ന ആരാധകർക്ക് ഈ വാർത്ത വലിയ ആശ്വാസമാണ് പകരുന്നത്.

ALSO READ: ഫിഫ ലോകകപ്പ് കളിയ്ക്കാൻ ഇന്ത്യയ്ക്കും അവസരം!; പുതിയ നീക്കവുമായി ഫിഫ

യുണൈറ്റഡ്8 സ്പോർട്സ് ചാനലുകൾ

ഇന്ത്യയിലെ പ്രമുഖ മാധ്യമ ഭീമന്മാരായ സീ എന്റർടൈൻമെന്റാണ് ഇത്തവണ ഫിഫ ലോകകപ്പിന്റെ സംപ്രേക്ഷണാവകാശം സ്വന്തമാക്കിയിരിക്കുന്നത് എന്നാണ് റിപ്പോർട്ട്. കായിക വിപണിയിലേക്ക് വൻ തിരിച്ചുവരവ് ലക്ഷ്യമിടുന്ന സീ ഗ്രൂപ്പ്, ലോകകപ്പിന് മുന്നോടിയായി പുതിയ ഏഴ് സ്‌പോർട്സ് ചാനലുകൾ ആരംഭിക്കാൻ ഒരുങ്ങുകയാണ്. യുണൈറ്റഡ്8 സ്‌പോർട്‌സ് എന്ന പേരിലായിരിക്കും ഈ ചാനലുകൾ ഇന്ത്യൻ പ്രേക്ഷകരിലേക്ക് എത്തുക. ഈ ചാനലിനുകളിലൂടെയായിരിക്കും ലോകകപ്പ് സംപ്രേക്ഷണം ഉണ്ടാവുക.

പുതിയ ചാനൽ ശൃംഖല ആരംഭിക്കുന്നതിനായി സീ എന്റർടൈൻമെന്റ് ഇതിനോടകം തന്നെ ട്രേഡ്മാർക്കിനായി അപേക്ഷ സമർപ്പിച്ചതായി ടൈംസ് ഓഫ് ഇന്ത്യ റിപ്പോർട്ട് ചെയ്യുന്നുണ്ട്. യുണൈറ്റഡ്8 സ്‌പോർട്‌സ് 1, യുണൈറ്റഡ്8 സ്‌പോർട്‌സ് 2 എന്നിങ്ങനെ വിവിധ പേരുകളിലായിരിക്കും ഈ ഏഴ് ചാനലുകൾ ലഭ്യമാകുക. തുടക്കത്തിൽ ഇംഗ്ലീഷ്, ഹിന്ദി ഭാഷകളിലായിരിക്കും കമന്ററിയും മറ്റ് വിശകലനങ്ങളും പ്രേക്ഷകർക്ക് മുന്നിൽ അവതരിപ്പിക്കുക.

ALSO READ: ആദ്യമായി ലോകകപ്പിന് യോഗ്യത നേടി, പക്ഷെ അതും നഷ്ടപ്പെടുമോ എന്ന ഭയം: കോംഗോയുടെ ലോകകപ്പ് സ്വപ്‌നം കരിനിഴലിൽ

കോടികളുടെ കരാർ

ഏകദേശം 30 മുതൽ 35 മില്യൺ യുഎസ് ഡോളർ വരെ മൂല്യം വരുന്ന വമ്പൻ തുകയ്ക്കാണ് സീ എന്റർടൈൻമെന്റ് ഫിഫയുമായി കരാറിലെത്തിയിരിക്കുന്നത് എന്നാണ് പുറത്തുവരുന്ന അനൗദ്യോഗിക വിവരങ്ങൾ. ജൂൺ 11ന് ലോകകപ്പ് മത്സരങ്ങൾക്ക് പന്തുരുളാൻ ദിവസങ്ങൾ മാത്രം ബാക്കിനിൽക്കെയാണ് ഈ നിർണായക നീക്കം നടന്നിരിക്കുന്നത്. ഇന്ത്യയിലെ സംപ്രേക്ഷണം സംബന്ധിച്ച് കടുത്ത അനിശ്ചിതത്വം നിലനിന്ന സാഹചര്യം കായികപ്രേമികളെ വലിയ രീതിയിൽ നിരാശരാക്കിയിരുന്നു. എന്നാൽ പുതിയ ബിസിനസ്സ് സാധ്യതകൾ മുൻനിർത്തി സീ രംഗത്തിറങ്ങിയതോടെ പ്രതിസന്ധി ഒഴിയുകയായിരുന്നു.

നേരത്തെ ഇന്ത്യയിൽ ഫുട്ബോൾ ലോകകപ്പ് സംപ്രേക്ഷണം ചെയ്തിരുന്ന സ്റ്റാർ സ്പോർട്സ്, സോണി സ്പോർട്സ് തുടങ്ങിയ പ്രമുഖ നെറ്റ്‌വർക്കുകൾ ഫിഫയുടെ ഉയർന്ന കരാർ തുക കാരണം ഈ വർഷത്തെ അവകാശത്തിൽ നിന്നും പിൻമാറിയിരുന്നു. ഫിഫ പിന്നീട് തുകയിൽ ചില ഇളവുകൾ വരുത്തിയെങ്കിലും ഈ ചാനലുകൾ താല്പര്യം പ്രകടിപ്പിച്ചിരുന്നില്ല. ഇതേത്തുടർന്ന് പൊതുമേഖലാ ചാനലായ ദൂരദർശൻ ലോകകപ്പ് സംപ്രേക്ഷണം ഏറ്റെടുത്തേക്കുമെന്ന് വാർത്തകൾ വന്നെങ്കിലും ദൂരദർശൻ അധികൃതർ ഈ വാർത്തകൾ നിഷേധിക്കുകയാണുണ്ടായത്.

ALSO READ: ആഴ്‌സണൽ: ആധുനിക ഫുട്ബോളിലെ ഒരു മഹാകാവ്യം: ആർസെൻ വെംഗറിൽ നിന്ന് മിക്കേൽ ആർട്ടേറ്റയിലേക്ക്

പുതിയ മത്സരത്തിനൊരുങ്ങി സ്പോർട്സ് സംപ്രേക്ഷണ വിപണി

ഫിഫ ലോകകപ്പ് എന്ന മഹാമേളയോടെ ചാനൽ ലോഞ്ച് ചെയ്തുകൊണ്ട് ഇന്ത്യൻ കായിക വിപണിയിൽ തങ്ങളുടെ സാന്നിധ്യം ശക്തമാക്കാനാണ് സീ എന്റർടൈൻമെന്റ് നിലവിൽ ലക്ഷ്യമിടുന്നത്. ലോകകപ്പിന് ശേഷവും ക്രിക്കറ്റ് ഉൾപ്പെടെയുള്ള ഭാവിയിലെ വലിയ കായിക മാമാങ്കങ്ങളും തത്സമയം ടെലികാസ്റ്റ് ചെയ്ത് രാജ്യത്തെ മുൻനിര സ്പോർട്സ് ചാനലായി മാറാനാണ് യുണൈറ്റഡ്8 സ്പോർട്സിലൂടെ കമ്പനി പദ്ധതിയിടുന്നത്.

നിലവിൽ സ്റ്റാർ സ്പോർട്സും സോണി സ്പോർട്സും കുത്തകയാക്കി വെച്ചിരിക്കുന്ന ഇന്ത്യൻ സ്പോർട്സ് ബ്രോഡ്കാസ്റ്റിംഗ് രംഗത്തേക്ക് പുതിയൊരു ശക്തനായ മത്സരാർത്ഥി കൂടി എത്തുന്നതിനെ കായിക ലോകം സ്വാഗതം ചെയ്യുന്നുണ്ട്. കൂടുതൽ മത്സരങ്ങൾ മികച്ച ഗുണനിലവാരത്തോടെ ടെലിവിഷൻ സ്ക്രീനുകളിൽ കാണാൻ സാധിക്കുമെന്നത് ഇന്ത്യൻ കായിക പ്രേമികൾക്ക് നൽകുന്ന ആശ്വാസം ചെറുതല്ല. വരും ദിവസങ്ങളിൽ തന്നെ ചാനലിന്റെ ലോഗോ പ്രകാശനവും ഔദ്യോഗിക പ്രഖ്യാപനവും ഉണ്ടാകുമെന്നാണ് റിപ്പോർട്ടുകൾ വ്യക്തമാക്കുന്നത്.

ALSO READ: എന്ത് കൊണ്ട് കേരളത്തിൽ ലോകകപ്പ് ആവേശം കുറയുന്നു? 2 കാരണങ്ങൾ

 

https://x.com/Shaji4Football/status/2058037791024664807

 

Summary: Indian football fans can rejoice as FIFA World Cup 2026 broadcast India rights are reportedly secured by Zee Entertainment. The broadcaster plans to launch seven new channels under “United8 Sports” for the tournament, resolving weeks of uncertainty just ahead of the June 11 kickoff.