ആദ്യമായി ലോകകപ്പിന് യോഗ്യത നേടി, പക്ഷെ അതും നഷ്ടപ്പെടുമോ എന്ന ഭയം: കോംഗോയുടെ ലോകകപ്പ് സ്വപ്‌നം കരിനിഴലിൽ

ഫുട്ബോൾ പ്രേമികൾ ആവേശത്തോടെ കാത്തിരിക്കുന്ന ഫിഫ ലോകകപ്പ് (FIFA World Cup 2026) മത്സരങ്ങൾക്ക് ദിവസങ്ങൾ മാത്രം ബാക്കി നിൽക്കെ ആശങ്ക കോംഗോ. തങ്ങളുടെ ചരിത്രത്തിലെ ആദ്യത്തെ ലോകകപ്പ് ടൂർണമെന്റ് കളിക്കാൻ യോഗ്യത നേടിയ ഡെമോക്രാറ്റിക് റിപ്പബ്ലിക് ഓഫ് കോംഗോ ടീമിന്റെ പങ്കാളിത്തം ഇപ്പോൾ വലിയൊരു പ്രതിസന്ധി നേരിടുകയാണ്.

കോംഗോയിൽ പെട്ടെന്ന് പടർന്നുപിടിച്ച മാരകമായ എബോള വൈറസ് ബാധയാണ് ഈ ആഫ്രിക്കൻ രാജ്യത്തിന്റെ ലോകകപ്പ് സ്വപ്നങ്ങൾക്ക് മുകളിൽ കരിനിഴൽ വീഴ്ത്തിയിരിക്കുന്നത്. രോഗബാധ അതിരൂക്ഷമായ സാഹചര്യത്തിൽ ടീമിന്റെ എല്ലാവിധ ലോകകപ്പ് മുന്നൊരുക്കങ്ങളെയും ദോഷകരമായി ബാധിച്ചിരിക്കുകയാണ്.

രാജ്യത്ത് അതീവ മാരകമായ എബോള വൈറസ് വകഭേദം പടർന്നു പിടിച്ചതിനെത്തുടർന്ന് ലോകകപ്പിന് മുന്നോടിയായി നാട്ടിൽ നടത്താനിരുന്ന എല്ലാ പരിശീലന ക്യാമ്പുകളും റദ്ദാക്കാൻ കോംഗോ ഫുട്ബോൾ അസോസിയേഷൻ കഴിഞ്ഞ ദിവസം നിർബന്ധിതരായിരിക്കുകയാണ്.

ലോകകപ്പ് ഫുട്ബോൾ മാമാങ്കത്തിന് ഇനി വെറും ദിവസങ്ങൾ മാത്രമാണ് ബാക്കിയുള്ളത്. ഈ ചുരുങ്ങിയ സമയത്തിനുള്ളിൽ നിർത്തിവെച്ച പരിശീലന ക്യാമ്പുകൾ എന്ന് പുനഃസ്ഥാപിക്കാൻ സാധിക്കുമെന്നതിനെക്കുറിച്ച് യാതൊരുവിധ ഔദ്യോഗിക അറിയിപ്പും നൽകാൻ നിലവിൽ രാജ്യത്തെ കായിക അധികൃതർക്ക് സാധിക്കുന്നില്ല. ഇത് ടീമിന്റെ ഒത്തിണക്കത്തെയും കളിക്കാരുടെ ശാരീരിക ക്ഷമതയെയും വലിയ രീതിയിൽ ബാധിക്കുമെന്നുറപ്പാണ്.

ആഫ്രിക്കൻ രാജ്യങ്ങളിലുണ്ടായ ഈ പ്രതിസന്ധിയിൽ ഫിഫ തങ്ങളുടെ ഔദ്യോഗിക പ്രതികരണം വ്യക്തമാക്കിയിട്ടുണ്ട്. കോംഗോയിലെ നിലവിലെ അടിയന്തര സാഹചര്യം തങ്ങൾ വളരെ കൃത്യമായി നിരീക്ഷിച്ചുവരികയാണെന്ന് ഫിഫ വക്താക്കൾ അറിയിച്ചു. നിലവിലെ അവസ്ഥയെക്കുറിച്ച് തങ്ങൾക്ക് വ്യക്തമായ അറിവുണ്ടെന്നും ലോകാരോഗ്യ സംഘടനയുമായി ചേർന്ന് കാര്യങ്ങൾ വിലയിരുത്തുന്നുണ്ടെന്നും ഫിഫ വ്യക്തമാക്കിയിട്ടുണ്ട്. എന്നാൽ കോംഗോ ടീമിനെ ലോകകപ്പിൽ പങ്കെടുപ്പിക്കുമോ അതോ മാറ്റിനിർത്തുമോ എന്ന കാര്യത്തിൽ ഫിഫ ഇതുവരെ അന്തിമമായ ഒരു തീരുമാനം പ്രഖ്യാപിച്ചിട്ടില്ല.

കടുത്ത രോഗവ്യാപനത്തിന്റെ പശ്ചാത്തലത്തിൽ ആഗോള തലത്തിലും വലിയ നിയന്ത്രണങ്ങളാണ് വന്നിരിക്കുന്നത്. കഴിഞ്ഞ മൂന്നാഴ്ചയ്ക്കുള്ളിൽ കോംഗോയിൽ സന്ദർശനം നടത്തി തിരികെ എത്തിയ വിദേശ പൗരന്മാർക്ക് അമേരിക്കയിൽ പ്രവേശിക്കുന്നതിന് ഇപ്പോൾ കർശനമായ വിലക്ക് ഏർപ്പെടുത്തിയിട്ടുണ്ട്. ഈ വർഷത്തെ ലോകകപ്പ് മത്സരങ്ങൾക്ക് പ്രധാനമായും വേദിയാകുന്നത് അമേരിക്കൻ നഗരങ്ങളാണ് എന്നതുകൊണ്ട് തന്നെ ഈ യാത്രാവിലക്ക് കോംഗോ ടീമിന്റെ ലോകകപ്പ് യാത്രകളെയും വലിയ രീതിയിൽ പ്രതിസന്ധിയിലാക്കാൻ സാധ്യതയുണ്ട്. വരും ദിവസങ്ങളിൽ അമേരിക്കൻ ആരോഗ്യ മന്ത്രാലയം എടുക്കുന്ന തീരുമാനങ്ങൾ ഇതിൽ വളരെ നിർണായകമായി മാറും.

ALSO READ: ആഴ്‌സണൽ: ആധുനിക ഫുട്ബോളിലെ ഒരു മഹാകാവ്യം: ആർസെൻ വെംഗറിൽ നിന്ന് മിക്കേൽ ആർട്ടേറ്റയിലേക്ക്

സുരക്ഷിതരാണെന്ന് ദേശീയ ടീം അധികൃതർ

അമേരിക്കൻ ഭരണകൂടം കടുത്ത യാത്രാവിലക്ക് ഏർപ്പെടുത്തിയിട്ടുണ്ട് എങ്കിലും തങ്ങളുടെ കളിക്കാർ പൂർണ്ണമായും സുരക്ഷിതരാണെന്നാണ് കോംഗോ ദേശീയ ടീം അധികൃതർ ഇപ്പോൾ അവകാശപ്പെടുന്നത്. ടീമിലെ ഭൂരിഭാഗം മുൻനിര താരങ്ങളും യൂറോപ്പിലെ വിവിധ പ്രമുഖ ക്ലബ്ബുകൾക്ക് വേണ്ടിയാണ് കളിക്കുന്നത്. അതുകൊണ്ട് തന്നെ അവരുടെ പരിശീലനങ്ങളും മറ്റ് തയ്യാറെടുപ്പുകളും യൂറോപ്യൻ മണ്ണിലാണ് നടന്നിരുന്നത്. ഈ കളിക്കാരൊന്നും തന്നെ നിലവിൽ രോഗബാധയുള്ള തങ്ങളുടെ സ്വന്തം നാട്ടിലേക്ക് യാത്ര ചെയ്തിട്ടില്ലാത്തതിനാൽ ഇവർ സുരക്ഷിത വലയത്തിലാണെന്ന് അധികൃതർ വ്യക്തമാക്കുന്നു.

കഴിഞ്ഞ ഇരുപത്തിയൊന്ന് ദിവസത്തിനുള്ളിൽ ഔദ്യോഗിക ആവശ്യങ്ങൾക്കായി കോംഗോയിലേക്ക് മടങ്ങേണ്ടി വന്ന രാജ്യത്തിന്റെ ലോകകപ്പ് പ്രതിനിധി സംഘത്തിലെ ചില അംഗങ്ങൾക്ക് ഇപ്പോൾ കർശനമായ ക്വാറന്റൈൻ ഏർപ്പെടുത്തുമെന്ന് കായിക മന്ത്രാലയം വ്യക്തമാക്കിയിട്ടുണ്ട്. ഇവരെ കൃത്യമായ പരിശോധനകൾക്ക് വിധേയമാക്കിയതിന് ശേഷം മാത്രമേ ടീമിനൊപ്പം ചേരാൻ അനുവദിക്കുകയുള്ളൂ.

ഇത്തവണത്തെ ലോകകപ്പ് ഗ്രൂപ്പ് ഘടന പരിശോധിച്ചാൽ ശക്തരായ ടീമുകൾക്കൊപ്പമാണ് കോംഗോയുടെ സ്ഥാനം. പോർച്ചുഗൽ, കൊളംബിയ, ഉസ്ബകിസ്ഥാൻ എന്നീ ടീമുകൾക്കൊപ്പം ഗ്രൂപ്പ് കെയിലാണ് കോംഗോ ഉൾപ്പെട്ടിരിക്കുന്നത്.

ലോകകപ്പിൽ അവരുടെ ചരിത്രത്തിലെ ഏറ്റവും ആദ്യത്തെ മത്സരം ജൂൺ പതിനേഴിന് ശക്തരായ പോർച്ചുഗലിന് എതിരെയാണ്. ക്രിസ്റ്റ്യാനോ റൊണാൾഡോയുടെ നായകത്വത്തിൽ ഇറങ്ങുന്ന പോർച്ചുഗലിനെപ്പോലൊരു വമ്പൻ ടീമിനെ നേരിടാൻ കൃത്യമായ പരിശീലനം അനിവാര്യമാണ്. എന്നാൽ എബോള വൈറസ് കാരണം പരിശീലനം പൂർണ്ണമായി തടസ്സപ്പെട്ട അവസ്ഥയിൽ കോംഗോയ്ക്ക് കളിക്കളത്തിൽ എത്രത്തോളം തിളങ്ങാൻ സാധിക്കും എന്ന കാര്യത്തിൽ വലിയ സംശയമുണ്ട്.

ALSO READ: എന്ത് കൊണ്ട് കേരളത്തിൽ ലോകകപ്പ് ആവേശം കുറയുന്നു? 2 കാരണങ്ങൾ

English Summary : DR Congo’s historic debut in the FIFA World Cup 2026 faces a major threat due to a rare Ebola outbreak. The team had to cancel its training camp, and with upcoming strict quarantine rules, their opening match against Portugal remains highly uncertain.

content: FIFA World Cup 2026

Follow Footy Times on Social Media:

Facebook | Instagram | Twitter | YouTube