ഫിഫ ലോകകപ്പ് ഇന്ത്യയിൽ എങ്ങനെ കാണും?; ജിയോയും സോണിയും കൈവിട്ടതോടെ ഇനി 2 പ്രതീക്ഷകൾ മാത്രം

ഫുട്ബോൾ ലോകം കാത്തിരിക്കുന്ന വിശ്വമേളയ്ക്ക് ഇനി വെറും ദിവസങ്ങൾ മാത്രം ബാക്കിനിൽക്കെ, ഇന്ത്യൻ ആരാധകർ വലിയൊരു പ്രതിസന്ധിയിലാണ് (FIFA World Cup 2026).

ജൂൺ 11ന് കിക്കോഫ് കുറിക്കുന്ന ലോകകപ്പിന്റെ ഇന്ത്യയിലെ സംപ്രേഷണാവകാശം ഇതുവരെ ആരും സ്വന്തമാക്കിയിട്ടില്ല.

രാജ്യത്തെ മുൻനിര മാധ്യമ കമ്പനികളൊന്നും അവകാശം ഏറ്റെടുക്കാൻ മുന്നോട്ട് വരാത്തതോടെ മത്സരങ്ങൾ തത്സമയം കാണാൻ കഴിയുമോ എന്ന ആശങ്കയിലാണ് ഫുട്ബോൾ പ്രേമികൾ. ഈ സാഹചര്യത്തിൽ ആരാധകർക്ക് നിരാശയുണ്ടാക്കാത്ത ബദൽ മാർഗങ്ങൾ തേടുകയാണ് ഫിഫ.

കഴിഞ്ഞ ഖത്തർ ലോകകപ്പിന്റെ സംപ്രേഷണാവകാശം ഏകദേശം 574 കോടി രൂപയ്ക്കാണ് വിറ്റുപോയത്. അന്ന് വയാകോം 18 ആയിരുന്നു ഈ അവകാശം സ്വന്തമാക്കിയിരുന്നത്.

വരാനിരിക്കുന്ന ലോകകപ്പിനായി ഫിഫ ആദ്യം ചോദിച്ചത് 920 കോടി രൂപയായിരുന്നു. എന്നാൽ ഇന്ത്യയിലെ പ്രമുഖ കമ്പനികൾ ഈ തുക നൽകാൻ തയ്യാറായില്ല.

പിന്നീട് ഫിഫ ഈ തുക വലിയ തോതിൽ കുറച്ചെങ്കിലും വിപണിയിൽ നിന്ന് അനുകൂലമായ പ്രതികരണമുണ്ടായില്ല. നിലവിൽ 3.5 കോടി ഡോളറിലേക്ക് വരെ ഫിഫ തങ്ങളുടെ ആവശ്യം താഴ്ത്തിയിട്ടുണ്ട്.

ഇന്ത്യൻ മാധ്യമ രംഗത്തെ പ്രമുഖരായ വയാകോം 18, സ്റ്റാർ ഇന്ത്യ എന്നിവർ ലയിച്ച് ‘ജിയോസ്റ്റാർ’ എന്ന ഒറ്റ കമ്പനിയായി മാറിയതാണ് ഈ പ്രതിസന്ധിക്ക് പ്രധാന കാരണം.

വിപണിയിൽ മത്സരിക്കാൻ മറ്റ് വലിയ കമ്പനികൾ ഇല്ലാതായതോടെ ഫിഫ ചോദിക്കുന്ന വലിയ തുക നൽകാൻ ആരും തയ്യാറാകുന്നില്ല.

സോണി പോലുള്ള കമ്പനികളും ഈ കാര്യത്തിൽ മൗനം പാലിക്കുകയാണ്. ഇത് ഫിഫയെ കടുത്ത സമ്മർദ്ദത്തിലാക്കുന്നുണ്ട്.

പ്രതീക്ഷയായി ദൂരദർശനും യുട്യൂബും

പ്രധാന കമ്പനികൾ പിന്മാറിയതോടെ മത്സരങ്ങൾ മുടങ്ങാതെ ആരാധകരിലേക്ക് എത്തിക്കാൻ ചില ബദൽ വഴികൾ ഫിഫ ആലോചിക്കുന്നുണ്ട്. പൊതുമേഖലാ സ്ഥാപനമായ ദൂരദർശൻ മത്സരങ്ങൾ പ്രദർശിപ്പിക്കാൻ താൽപ്പര്യം അറിയിച്ചിട്ടുണ്ട്. കൂടാതെ, സ്വന്തം ഫീഡ് ഉപയോഗിച്ച് യുട്യൂബിലൂടെ നേരിട്ട് മത്സരങ്ങൾ ലൈവ് കാണിക്കാനുള്ള സാധ്യതയും ഫിഫ പരിശോധിക്കുന്നുണ്ട്.

ഏറ്റവും കൂടുതൽ ഫുട്ബോൾ ആരാധകരുള്ള രാജ്യങ്ങളിലൊന്നായ ഇന്ത്യയിൽ ലോകകപ്പ് സംപ്രേഷണം ചെയ്യാതിരിക്കുന്നത് ഫിഫയ്ക്കും വലിയ സാമ്പത്തിക നഷ്ടമുണ്ടാക്കും. വരും ദിവസങ്ങളിൽ ഈ വിഷയത്തിൽ നിർണ്ണായകമായ ഒരു തീരുമാനം ഉണ്ടാകുമെന്നാണ് കരുതപ്പെടുന്നത്. എന്തായാലും യുട്യൂബ് വഴിയോ ദൂരദർശൻ വഴിയോ മത്സരങ്ങൾ കാണാൻ സാധിക്കുമെന്ന നേരിയ പ്രതീക്ഷയിലാണ് ഇപ്പോൾ ഇന്ത്യൻ ഫുട്ബോൾ പ്രേമികൾ.

ALSO READ: അർജന്റീനയുടെ ലോകകപ്പ് സ്‌ക്വാഡിൽ നിന്ന് യുവതാരം പുറത്ത്; തിരിച്ചടിയായത് കരിയറിലെ മോശം പ്രകടനം; നിരാശ

English Summary : FIFA World Cup 2026 broadcast rights in India remain unsold with just 43 days left. Due to the JioStar merger and lack of competition, major broadcasters have skipped the bid. FIFA is now considering alternative platforms like DD Sports or YouTube to stream matches live for Indian fans.